Дэлхийн “Жүдо бөхийн өдөр" жил бүрийн аравдугаар сарын 28-ны өдөр тохиодог. Тус өдөрт зориулан “Монголын жүдо академи” бага насны ангиллын суралцагч хүүхдүүдийн дунд нөхөрсөг тэмцээн зохион байгууллаа. Жүдо бөх, “Кодокан” сургуулийг үндэслэгч Жигоро Кано багшийн хорвоод мэндэлсэн энэхүү өдөр дэлхий даяараа жүдо бөхийн үнэт зүйлс, өв уламжлал, үнэ цэнийг тэмдэглэн баярладаг билээ.

          Жүдо бөхийн “Их Шавь” салбарт зохион байгуулагдсан энэхүү тэмцээнд “Монголын жүдо академи”-ийн “Тэмүүлэл”, “Мөнхийн Үсэг”, “Спортын төв ордон”, “Их Шавь” гэсэн дөрвөн салбарын 150 гаруй бяцхан жүдочид оролцож өрсөлдсөн юм. Ихэнх тамирчдын хувьд энэ арга хэмжээ жүдо бөхөөр хичээллэж эхэлснээс нь хойш оролцсон анхны тэмцээн болон хүртсэн анхны медаль байлаа.