Монголын сагсан бөмбөгийн холбооны сагсан бөмбөгийн дасгалжуулагчийн "С" зэрэглэл олгох сургалтын эхний шат амжилттай зохион байгуулагдаж өндөрлөлөө. Тус сургалт энэ сарын 17-20-ны өдрүүдэд “UG Arene” болон “Gan Sport Center”-т дөрвөн өдрийн турш тэнхим болон практикаар явагдаж оролцогчид сертификатаа гардан авлаа.

        Сургалтыг “Fiba Instructor” Серби Улсын мэргэжилтэн Zeljko Vasiljevic удирдан явуулж бага наснаас нь мэргэжлийн тамирчин болох хүртэл нь тамирчидтай хэрхэн зөв ажиллах талаар заасан байна. Энэхүү сургалт нь маш өргөн сар хүрээтэй болж Улаанбаатар хотын сургууль, клубүүд болон Монгол Улсын өнцөг булан бүрээс нийт 180 гаруй багш дасгалжуулагчид хамрагджээ.

       Тэр дундаа Монгол Улсын баруун хязгаар Баян-Өлгий аймгаас зорин ирсэн нь сагсан бөмбөг Монгол Улсад хурдацтай хөгжиж байгаагийн илэрхийлэл бөгөөд тус сургалтын гол онцлогын нэг байлаа. Сургалтын үеэр багш дасгалжуулагчид зарим нэг асуудлуудын талаар санал хүсэлтээ илэрхийлсэн бөгөөд МСБХ болон МСБДХ-оос энэхүү санал хүсэлтүүдийг хүлээн авч дэмжин ажиллана гэдгээ хэлжээ.

        Мөн дараа дараагийн шатны сургалтуудаар БСШУЯ-тай хамтран багш дасгалжуулагчдыг саад бэрхшээлгүй сургалтад хамрагдах нөхцөл бололцоогоор хангаж ажиллахаа илэрхийллээ. Дасгалжуулагчийн "С" зэрэглэлийн хоёрдугаар шатны сургалт арваннэгдүгээр сарын 14-17-ны өдрүүдэд болох юм.