“Монголын жүдо академи”-ийн баг тамирчид Япон Улсын Токио хотноо зохион байгуулагдсан “VIVA JUDO” багийн аварга шалгаруулах олон улсын тэмцээнд оролцож тоосоо өргөөд иржээ. Тус тэмцээнийг олимп (1992) болон дэлхийн (1999) аварга, Японы алдарт жүдоч Ёшида Хидэхико анх санаачилж, одоог хүртэл зохион байгуулж байгаа юм байна.

     Энэ удаагийн 17 дахь удаагийн “VIVA JUDO” тэмцээнд128 байгууллага оролцсон аж. Харин “Монголын жүдо академи”-ийн таван өсвөрийн тамирчид урилгаар оролцож ур чадвар, хүч чадлаа сорьжээ. Мөн тэмцээний дараа манай тамирчид “Кодокан” институтын дэргэдэх "Касүга" болон “Park 24” дэвжээний тамирчидтай цуг хамтарсан бэлтгэл хийсэн байна.

      Тэмцээнийг зохион байгуулагч “Times” группийн дэргэдэх “Park 24” багт харьяалагддаг дэлхийн шилдэг жүдочид энэхүү бэлтгэлд ирж оролцсоны дотор олимп, дэлхийн аварга Абэ Хифүми (-66 кг), Сонэ Акира (+78 кг), дэлхийн аварга Хашимото Соичи (73 кг) нар багтаж байлаа. Мөн олимп, дэлхийн аваргын мөнгөн медальтай Азербайжаны Рустам Оружов (73 кг) урилгаар Токиод ирж хамтарсан бэлтгэл хийжээ.

      Дэлхийд нэрээ дуурсгасан эдгээр алдартай тамирчидтай уулзаж, хамт бэлтгэл хийж, дархан мэхийг нь заалгаж, урмын үгийг нь сонсож, хамт зургаа даруулсан нь манай тамирчдын хувьд энэ аяллын хамгийн онцлох мөчүүдийн нэг нь байсан гэнэ.

     Үүнээс гадна өсвөрийн тамирчид маань дэлхийн жүдо бөхийн төв гэгддэг “Кодокан институти”-д зочилж, дэвжээн дээр нь бэлтгэл хийж, япон орны ёс заншилтай танилцаж, нүд тайлж туршлага харимтлуулсан мартагдашгүй найм хоногийг Япон Улсад өнгөрүүлжээ.