Ой тогтоолтын 31 дэх удаагийн дэлхийн аварга шалгаруулах тэмцээн БНХАУ-д болох байсан хэдий ч хорио цээрийн улмаас өнгөрсөн оны арванхоёрдугаар сарын 16-18-ны өдрүүдэд онлайн хэлбэрээр зохион байгуулагдсан байна. Дэлхийн ой тогтоолтын спортын холбооноос тэмцээний нэгдсэн дүнг 2023 оны нэгдүгэр сарын 21-ний өдөр албан ёсоор зарлаж шилдгүүдээ тодрууллаа.

           Тус тэмцээнд 24 улсын шилдэг 400 гаруй тамирчин ой тогтоолтын спортын 10 төрлөөр өрсөлдсөнөөс нийлбэр дүнгээр бага насны ангилалд 4813 оноогоор Э.Үүрийнцолмон, өсвөр насны ангилалд 5512 оноогоор Ц.Оюун-Эрдэнэ, насанд хүрэгчдийн ангилалд 7904 оноогоор олон улсын их мастер Т.Тэнүүн нар тэргүүлж нас насны ангилалдаа дэлхийн аварга болсон байна.

          Мөн ерөнхий дүн буюу тэмцээнд оролцсон бүх тамирчдаас хамгийн өндөр оноог авснаар 2022 оны ой тогтоолтын дэлхий аваргаар олон улсын их мастер Т.Тэнүүн тодорлоо. Манай баг тамирчид 90 багц медалиас 54 медаль хүртжээ. Үүнд 20 алт, 15 мөнгө, 19 хүрэл медаль хүртэж, 19018 оноогоор Монгол Улсын баг дэлхийн аварга баг боллоо.

         Монгол Улсаа төлөөлж Улаанбаатар хот болон орон нутгаас нийт 30 тамирчин тус тэмцээнд оролцсон байна.  Их мастер цолны болзолыг Ц.Оюун-Эрдэнэ, Н.Нандин-Учрал, З.Намуун, олон улсын мастер цолны болзлыг Э.Үүрийнцолмон, Б.Дөлбаяр, Ц.Номин-Эрдэнэ, Э.Хишиг-Эрдэнэ, Г.Наранцацрал нар тус тус хангажээ.