Монголын спортын корпорациас зохион байгуулж буй “UNC-2023” 15 спорт холбооны улсын аварга шалгаруулах тэмцээний дөрөв дэх өдөр хүндийг өргөлтийн тамирчид өрсөлдөж байна. Энэ өдрийн эхний жин эмэгтэйчүүдийн 49 кг-ын жингийн тэмцээн болов. Тус жинд “Увс нуур” клубийн Батнасангийн Тунгалаг үнэмлэхүй ялалт байгуулсан байна. Тэрбээр огцом өргөлтөөр 59 кг, түлхэлттэй өргөлтөөр 72 кг, нийт 131 кг-ыг өргөсөн амжилтаар гурван алтан медалийн болзол хангалаа. Б.Тунгалаг нь өмнө нь өсвөр үе, залуучууд, насанд хүрэгчдийн УАШТ-д нийтдээ зургаан удаа түрүүлээд байжээ.

         Б.Тунгалаг  Монгол Улсын дээд амжилтыг 52 удаа шинэчлэн тогтоож байв. Мөн тэрбээр огцом өргөлтөөр 80, түлхэлттэй 100 кг-ыг өргөж байсан нь хувийн дээд амжилт нь юм. Энэ жинд нийлбэр дүнгээр 118 кг-ыг хоёр тамирчин өргөсөн байна. Олон улсын хүндийг өргөлтийн шинэчлэсэн дүрмийн дагуу сугалааны дагуу эхэлж тус жинг өргөсөн тамирчин мөнгөн медаль хүртлээ. Ингэснээр “Ээрмэл” клубийн Чойжхүүгийн Анужин огцомоор 56 кг, түлхэлттэй 62 кг-ыг өргөсөн амжилтаар мөнгөн медаль авлаа. Харин хүрэл медалийг “Өв хүч” клубийн Отгонжаргалын Хишигцогзол хүртсэн байна. О.Хишигцогзол огцом өргөлтөөр 53 кг, түлхэлттэй өргөлтөөр 65 кг-ыг өргөжээ.