Монгол Улсын волейболын үндэсний шигшээ багийн тамирчин, "Өмнөговь  Шанх транс” багийн ахлагч Б.Батсуурь Азербайжан Улсын лигт легионер тамирчнаар дөрвөн сарын хугацаанд тоглохоор болжээ. Спортын дэд мастер Б.Батсуурь нь 1998 онд төрсөн бөгөөд өндөр нь 190 см.  Түүний довтолгооны өндөр 340 см бол хаалт 318 см.

           Тэрбээр  арван настайгаасаа эхлэн волейболын спортоор тасралтгүй 14 жил хичээллэж байгаа. 2018 оноос "Эрчим" клубт харьяалагдаж тус багийн хамт 2018, 2019 оны залуучуудын улсын аваргаас алтан медаль хүртэж байв. Харин 2019 оны УАШТ-ий үнэ цэнтэй тоглогчоор шалгарсан. Түүний аав Баттөр волейболын спортын дасгалжуулагч юм.

        Б.Батсуурь волейболын спортын хувцас, хэрэглэлийн томоохон бренд болох "Mizuno", "Asics"-ийн нүүр царайгаар ажилладаг.Түүнийг спорт сонирхогчид, хүрээллийнхэн "шал, тааз" Батсуурь хэмээн нэрлэдэг.