Зүүн өмнөд Азийн найман улсын баг өрсөлддөг “ASEAN Basketball League”-т Монгол Улсын оролцож  өрсөлдөхөөр болжээ. Өнгөрөгч долоо хоногт Сингапур Улсад  “ABL”-ийн ээлжит бус хурал болсон бөгөөд цар тахлаас хойш анх удаагаа Азийн клубийн эзэд чуулж, дараагийн таван жилийн төлөвлөгөөгөө ярилцсан аж.

      Тус хуралд Хонконг, Индонез, Макао, Малайз, Филиппин, Сингапур, Тайланд, Вьетнамын найман багийн төлөөлөл гишүүнээр оролцсон бол зочин багаар Монгол Улсын сагсан бөмбөгийн дээд лигийн “М Гарьд” баг оролцсон байна.

     “М Гарьд” багийн төлөөлөл Монгол Улсын сагсан бөмбөгийн хөгжил сүүлийн жилүүдэд хурдацтай хөгжиж байгааг онцлоод, зөвхөн шигшээ багийн түвшинд биш, клубийн түвшинд Ази тивд ур чадвараа сориход бэлэн байгаагаа илэрхийлжээ.

       “ASEAN Basketball League”-ийн 2023-2024 оны улирал арваннэгдүгээр сард эхлэх бөгөөд Монгол Улсын сагсан бөмбөгчид өөрийн эх орондоо Азийн клубүүдийг хүлээн авч тоглодог, хагас жилийн турш Азийн бусад улсуудаар зочилж тоглодог болох эхлэлийг ийнхүү тавьсан байна.