“Гэгээ” дунд сургуулийн шатрын аварга шалгаруулах анхдугаар тэмцээн боллоо. Байгуулагдаад гурав дахь жилийнхээ нүүрийг үзэж байгаа тус сургуулийн 60 гаруй сурагч энэ тэмцээнд оролцсон нь шатрын спорт тус сургуульд хэр эрчимтэй хөгжиж байгааг харуулах чухал үзүүлэлт байв.

        Тэмцээнд бага ангийн хүүхдүүд маш идэвхитэй оролцсон нь цаашид энэ төрлийн спортоор том амжилт гаргах хөрс суурь бүрэлдэж байгаагийн илрэл байлаа. Тухайлбал зөвхөн 1-ийн “В” ангиас долоон хүүхэд энэ тэмцээнд оролцож 50-аас дээш хувийн амжилт үзүүллээ. Сургуулийн зүгээс тусгай шатрын кабинет байгуулж мэргэжлийн багш ФИДЕ мастер Ч.Мөнхбатыг урьж ажиллуулсан нь богино хугацаанд олон хүүхдийг хамран сургах таатай нөхцөлийг бүрдүүлжээ.

       Тус сургуулийн тэмцээн өсвөр үеийн улсын аварга шалгаруулах тэмцээний шагналтай дөхөж очихуйц шагнал урамшууллаар байлсан нь бяцхан шатарчид болон нийт эцэг эхчүүдийн урмыг ихэд сэргээсэн зүйл байв. Ирэх жил “Гэгэээ” сургууль энэ тэмцээний цар хүрээ хязгаарыг өргөтгөн Улаанбаатар хотын хэмжээнд нээлттэй хэлбэрээр жил болгон зохион байгуулахаар шийдсэн байна.