Монголын жүдо академийн баг тамирчид жүдо бөхийн эх орон Япон Улсад тогтмол зочилж хамтарсан бэлтгэл болон тэмцээн уралдаанд оролцдог билээ. Суралцагчдынхаа ур чадвар, мэдлэг боловсролыг сайжруулж хөгжүүлэхийн тулд гадаад харилцаандаа үргэлж анхаарч шинийг эрэлхийлж байдаг юм. Тэгвэл энэхүү гадаад харилцааны хүрээнд өсвөрийн арван тамирчид саяхан Япон Улсын Шизүока мужид зочилж үеийнхэнтэйгээ ур чадвараа сориод иржээ.

        Тэд Изүнокүни хотын жүдо бөхийн клубүүдийн тэмцээнд оролцсон байна. Тус тэмцээнд Шизүока хотын ойролцоох бусад сумуудаас нийт 250 хүүхэд гаруй өсвөрийн жүдочин оролцож өрсөлджээ. Энэ  удаагийн тэмцээн энэ сарын 12-ны өдөр явагдаж өндөрлөсөн байна. Тус тэмцээнээс Жүдо академийн хүүхдүүд хоёр хүрэл медаль хүртсэн амжилт үзүүлжээ. Тэмцээний зургадугаар ангийн хөвгүүдийн ангилалд Б.Мөнгөндөл, охидын ангилалд Э.Цэлмүүн нар хүрэл медаль хүртжээ.