Монголын үндэсний паралимпын хорооны 2022 оны шилдгийн шилдгийг шалгаруулах ёслол "Улаанбаатар" зочид буудлын танхимд боллоо. Тус хорооны баг тамирчид улирч буй онд паралимпын өвлийн наадам, ДАШТ, Азийн АШТ, дэлхийн цом, гранпри тэмцээнээс спортын найман төрөлд 18 медаль хүртжээ.

    Монголын паралимпын хорооны оны “Шилдэг дэмжигч байгууллага”-аар “Дүүрэн трейд” ХХК, “Шилдэг спорт холбоо”-оор Монголын тэргэнцэртэй сэлэмний холбоо, “Шилдэг спортын холбоо”-оор Монголын пара жүдо бөхийн холбоо шалгарсан байна.

   Харин “Шилдэг баг”-аар АНЭУ-ын Дубай хотод болсон пара байт харвааны ДАШТ-ий эмэгтэйчүүдийн багийн төрөлд хүрэл медаль хүртсэн Д.Сэлэнгээ, Б.Жавхлантөгс нар тодорчээ. “Шилдэг залуу тамирчин”-аар пара цаначин Ц.Дашдорж, “Шилдэг эмэгтэй дасгалжуулагч”-аар Үндэсний шигшээ багийн дасгалжуулагч Б.Нарантуяа шалгарсан байна. “Шилдэг эрэгтэй дасгалжуулагч”-аар Б.Золбоо тодорчээ.

  “Шилдэг эмэгтэй тамирчин”-аар пара таэквондогийн тамирчин Х.Энхтуяа, “Шилдэг эрэгтэй тамирчин”-аар пара буудлагын тамирчин Г.Ганзориг шалгарсан аж. Харин “Шилдгийн шилдэг тамирчин”-аар пара жүдо бөхийн тамирчин Л.Туруунаа тодорсон байна.