Арванхоёрдугаар сарын 10-11-нд АНУ-ын Айво Стэйтд дэлхийн шилдэг найман багийн цомын аварга шалгаруулах тэмцээн болно. Тус дэлхийн цомын тэмцээнд Монгол Улсын шигшээ баг оролцохгүй болж, тамирчид хохирч болзошгүй нөхцөл байдал үүсээд байна.  Энэ талаар Монголын чөлөөт бөхийн холбооны ерөнхий нарийн бичгийн дарга, Азийн чөлөөт бөхийн холбооны генсек П.Буяндэлгэрээс тодрууллаа.

-Чөлөөт бөхийн дэлхийн цомын тэмцээнд явах манай бөхчүүдийн виз ямар шалтгааны улмаас гарахгүй хойшлогдсон юм бэ?

      -Манай тамирчид Америкийн визинд хуваарийн дагуу орсон.

-Тэгэхээр дэлхийн цомд тамирчид явах боломжтой гэсэн үг үү?

        -Дэлхийн цомд оролцох боломжтой гэж хэлэх их тулгамдуу байна. Улсын төсвөөс мөнгө өгөөгүй болохоор онгоцны  билет захиалах боломжгүй байгаа. Тэрнээс биш гадуур яриад, цахимаар шуугиад байгаа шиг виз гараагүй гэдэг асуудал байхгүй.

-АНУ-ын виз асуудалгүй гарсан юм бол бүх тамирчин дэлхийн цомд явах боломжтой юм биш үү?

       -Бүх тамирчид явах боломжтой биш ээ. Онгоцны билет захиалгаас шалтгаална. Бид эхний багаа арванхоёрдугаар сарын 8-ны онгоцоор явуулсан.

-Хэдэн тамирчин өчигдөр нисэв.  Америк руу ямар, ямар жинд барилдах, хэн хэн ниссэн бэ?

         -Яг одоо хэлэх боломжгүй байна. Тун удахгүй Америк руу ниссэн багийн бүрэлдэхүүний нэрсийг чөлөөт бөхийн сайт дээр гаргаж тавина. Түүнээс хараарай. Тэндээс мэдээлэл авах боломжтой. Өөр мэдээлэл өгөх боломжгүй байна.