Жүдо бөхийн Токиогийн  их дуулга тэмцээн ирэх арванхоёрдугаар сарын 3-4-ний өдрүүдэд болно. Тэмцээн хоёр өдрийн турш болох хуваарьтай байгаа. Одоогоор дэлхийн 63 улсын эрэгтэй 183, эмэгтэй 123, нийт 306 жүдоч оролцохоор урдчилсан мэдүүлэгээ өгөөд байна. Энэ удаагийн их дуулгын 60 кг-ын жинд 25 тамирчин, 66 кг-д 29 бөх, 73 кг-д 36 бөх, 81 кг-д 34 бөх, 90 кг-д 25 бөх, -100 кг-д 21 бөх, +100 кг-д 13 жүдочин барилдах юм. Харин эмэгтэйчүүдийн 48 кг-ын жинд 17 бөх, 52 кг-д 21 бөх, 57 кг-д 19 бөх, 63 кг-д 17 бөх, 70 кг-д 19 бөх, -78 кг-д 18 бөх, +78 кг-ын жинд 12 жүдочин хүч сорино.

    Манай улсаас дэлхийн аварга ОУХМ Ц.Цогтбаатар 73 кг-ын жинд,  дэлхийн аваргын мөнгөн медальт ОУХМ Э.Ариунболд 60 кг-д, дэлхийн аваргын хүрэл медальт ОУХМ Ё.Басхүү 66 кг-д, дэлхийн аваргын хүрэл медальт Л.Энхрийлэн 57 кг-ын жинд барилдах аж. Харин ОУХМ Б.Баасанхүү 48 кг-ын жинд , ОУХМ Л.Сосорбарам 52 кг-д , Б.Цогт-Очир 60 кг-д , О.Хүслэн -78 кг-д, Э.Энхзул +78 кг-д, Л.Сэргэлэн 81 кг-д, Л.Энхболд +100 кг-ын жинд барилдах мэдүүлэгээ өгсөн байна.

    Тэмцээний эхний өдөр эмэгтэй 57, 63, 70 кг, эрэгтэй 73, 81, 90 кг-ын жингийн барилдаан болно. Харин тэмцээний хоёр дахь өдөр эмэгтэйчүүдийн 48, 52, -78, +78 кг, эрэгтэйчүүдийн 60, 66, -100, +100 кг-ын жингийн барилдаан явагдаж тус тэмцээн өндөрлөх юм.