Йордан Улсын Амман хотод болж буй 2022 оны Ази тивийн боксын аварга шалгаруулах тэмцээний дөрөвний нэг буюу медалийн төлөөх шигшээ тулаанууд амжилттай явагдаж өндөрлөлөө. Ази тивийн аварга шалгаруулах тэмцээнээс манай боксчид түүхэн амжилт үзүүлж одоогийн байдлаар 10 тамирчин медалийн болзол хангаад байна.  Эмэгтэйчүүдийн 50 кг, эрэгтэй 71, 75, 80, 86, 92,+92 кг-ын жингийн 28 тулаан болов.  

     Энэ удаагийн Ази тивийн аварга шалгаруулах боксын тэмцээнд эмэгтэй 12, эрэгтэй 13, нийт 25 жинд 99 медалийн төлөө 30 орны 320 боксчид хүчээ сорьж буй юм. Медаль авсан байдлаар нийт 15 орон медальд багтсаны дотор Казахстан 20, Узбекистан 12, Энэтхэг 12, Монгол 10 медальтайгаар оролцогч орнуудыг хошуучилж явна.

     Эмэгтэйчүүдийн 50 кг-ын жинд манай Ази тивийн аваргын хүрэл медальт Б.Мөнгөнсаран 2014, 2016 онуудын дэлхийн аварга, Ази тивийн аварга Казахстаны боксчин Назым Кызабайтай маш ширүүн, тэнцүүхэн өрсөлдсөн тулаан хийв.  Манай тамирчин  3:2-ын харьцаатай оноогоор ялагдаж медалиас мултарсан нь харамсалтай байлаа.

     Эрэгтэйчүүдийн 71 кг-ын жинд ОУХМ О.Бямба-Эрдэнэ Солонгосын боксчин Сон Сеонжуныг гурван үеийн турш илт илүүрхэж давамгайлан 5:0 оноогоор ялалт байгуулж энэхүү тэмцээний Монгол Улсын 10 дахь хүрэл медалийн болзолыг хангалаа.  Өнөөдөр олон хүнд тулаан хийсэн тамирчид амарсан. Энэ сарын 9-нд эмэгтэйчүүдийн, Энэ сарын 10-ны өдөр эрэгтэйчүүдийн хагас шигшээ тулаанууд явагдаж аваргын төлөө өрсөлдөх боксчид тодорно. Хагас шигшээ буюу мөнгөн медалийн төлөөх тулааны эмэгтэйчүүд  52 кг-ын жинд Л.Алтанцэцэг, Энэтхэгийн 29 настай Минакшитай тулалдана.

      Харин  54 кг-ын жинд О.Есүгэн 2022 оны дэлхийн аваргын мөнгөн медальт, 25 настай Тайландын Жутамас Житпонгтой, 60 кг-ын жинд Т.Номин-Эрдэнэ залуучуудын Ази тивийн хошой аварга, 2018 оны залуучуудын олимпын мөнгөн медальт Тайландын Понтип Буапатай , 63 кг-ын жинд У.Шинэцэцэг 2022 оны дэлхийн аваргын хүрэл медальт,  Зүүн Өмнөд Азийн наадмын аварга Энэтхэгийн Парвиинтай, 70 кг-ын жинд Э.Эрдэнэтуяа, Тайландын боксчин Бейсон Маниконтой тус тус өрсөлдөнө.