Баку 2022  жүдогийн их дуулга тэмцээнд  63 орны  эрэгтэй 227, эмэгтэй 164, нийт 391 бөх зодоглож байна. Монгол Улсын шигшээ багаас өнөөдөр эмэгтэйчүүдийн 48 кг-ын жинд Б.Баасанхүү барилдана. Эмэгтэйчүүдийн 48 кг-ын жинд 23 бөх барилдана. Б.Баасанхүү нэгдүгээр тойрогт гоц мөргөн ялалт авсан. Дараагийн тойрогт Моранд, Сарсенбеш нарын ялсантай барилдах юм. Харин 52 кг-ын жинд 25 бөх барилдана. ОУХМ Л.Сосорбарам, “В” хэсэгт  Сербийн Петровичтой таарсан. Түүнийг ялах юм бол Швейцарийн Кочер, Азербайжаны Валиеява, Венесуэлийн Диаз нарын хэн ялсантай нь барилдана.

52 кг-ын “D” хэсэгт Т.Ариунзаяа,  Асбестатай таарсан. Түүнийг ялж чадвал Германы Вэллхаустай барилдах юм. Хэрэв түүнийг хожвол Италийн Гуффрида, Испанийн Перез, Бош болон Силва нарын хожсонтой барилдах юм.  57 кг-д  Г.Мөнхзаяа барилдана. Тэрбээр Английн Смет Дэвистэй таарлаа. Түүнийг ялах юм бол АНУ-ын Холгуин, Испанийн Гонзалез нарын хожсонтой барилдана.

Эрэгтэйчүүдийн 60 кг-ын жинд 20 бөх барилдах оноолттой байна. Манай бөх Б.Цогт-Очир Израилийн Коколаяевтай таарлаа. Түүнийг ялах юм бол Кахахстаны Давлатов Германы Хейдер, Азербайжаны Агхаяев нарын хэн хожсонтой барилдах болно.

Харин 66 кг-ын жингийн 33 бөх барилдах юм.  ОУХМ Б.Эрхэмбаяр “С” хэсгийг толгойлон барилдана.  Тэрбээр Швейцарийн Вайзенеггертэй таарсан. Түүнийг буулган авах юм бол Филиппиний Накано, Саудын Арабын Алжаязави нарын хэн ялсантай барилдах юм. Харин “А” хэсэгт Б.Нармандах, Казахстаны Киркизбаяевтай таарсан. Түүнийг ялвал Эстоны Пертелсон, Гүржийн Туташвили нарын ялсантай таарах юм.