Азийн олимпын зөвлөлөөс анх удаа “Жендэрийн тэгш байдал” сургалт семинарыг Бахрейн Улсын Манама хотноо аравдугаар сарын 30-31-ний өдрүүдэд зохион байгууллаа. Тус семинарт Олон улсын олимпын хороо, Үндэсний олимпын хороодын холбоод, Нэгдсэн үндэсний байгууллага, Улаан загалмай нийгэмлэг зэрэг байгууллагын төлөөлөл оролцож, туршлага мэдээлэл солилцсон байна.

     Семинарт нийт 42 Үндэсний олимпын хороод төлөөлөгчөө илгээсний дотор 36 төлөөлөгч нь тухайн ҮОХ-ны ерөнхий нарийн бичгийн дарга болон гүйцэтгэх зөвлөлийн гишүүд аж. Семинарын нээлтэд ОУОХ-ны ерөнхийлөгч Томас Бах видео мэндчилгээ илгээсэн бол АОЗ-ийн ерөнхийлөгчийн үүрэг гүйцэтгэгч Ража Рандхир Синг, Бахрейны ҮОХ-ны ерөнхийлөгч Шейх Халид бин Хамад Аль Халифа, АОЗ-ийн жендэрийн тэгш байдал комиссын гишүүд болон албаны бусад хүмүүс оролцжээ.