Монголын жүдо академийн ээлжит "Бүс гардуулах ёслол" Спортын төв ордонд боллоо. Сурч мэдсэнээ батлуулж, жүдо бөхийн шатаар нэг алхам өгсөж байгаа Жүдо Академийн суралцагчдад энэ өдөр эх орныхоо нэрийг дэлхийд дуурсгаж яваа Монголын шигшээ багийн шилдэг тамирчид бүсийг нь гардуулж өгсөн юм.

          Ташкент 2022  дэлхийн аварга шалгаруулах тэмцээний мөнгөн медальт, Ази тивийн аваргын хүрэл, их дуулга, гран при тэмцээнүүдийн хүрэл медальт, ОУХМ Э.Ариунболд болон “ Улаанбаатар их дуулга” тэмцээний хүрэл медальт О.Хүслэн нар энэ удаагийн арга хэмжээний хүндэт зочдоор уригдан оролцов.

          Жүдо бөхийн эрдэмд суралцаж, хичээж, урагшилж яваа дүү нартаа Э.Ариунболд, О.Хүслэн нар амжилт хүсээд, бэлтгэл сургуулилалтаа сайн хийж, өмнөө тавьсан зорилго, хүсэл мөрөөдөлдөө хүрэхийг захисан юм. Мөн өөрсдийн хамгийн сайн хийдэг, дархан мэхнүүдээсээ дүү нартайгаа хуваалцаж, зааж сургаж өгөв.