Дэлхийн аваргын хошой мөнгөн медальт, Монгол Улсын гавьяат тамирчин Оюунбилэгийн Пүрэвбаатарын нэрэмжит залуучуудын хөнгөн жингийн аварга шалгаруулах "Purevbaatar Cup" цомын тэмцээн энэ сарын 23-нд "Аврагч" спорт хорооны зааланд болж өндөрлөв. 2009 оноос жил бүр уламжлал болон явагдаж буй 14 дэх удаагийн тэмцээнд 12 багийн 50 гаруй тамирчин 57, 61, 65, 70 кг-ын жинд өрсөлдсөн юм.

    Энэ удаагийн тэмцээний 57 кг-ын жинд С.Жигүүр (МУБИС), 61 кг-д Г.Батнасан (Төгс), 65 кг-д Э.Төгсжаргал (Хасу-Мегастарс), 70 кг-д П. Мөнх-Эрдэнэ (Баянхонгор) нар түрүүлэв. Тус тэмцээний “Шилдэг дасгалжуулагч”-аар "Төгс" дэвжээний дасгалжуулагч Ч.Пүрэвбаяр, “Шилдэг шүүгч”-ээр Ж.Энхжин нар тодорлоо.