Олон улсын олимпын хорооны гишүүн, МҮОХ-ны ерөнхийлөгч Б.Баттүшиг өнгөрсөн долоо хоногт Япон Улсын төлөөлөгчдийг “Олимпик хауст” хүлээн авч уулзжээ. Япон Улсын ҮОХ-ны ерөнхийлөгч, ОУОХ-ны гишүүн Ясухиро Ямашита болон Япон Улсын ҮОХ-ны Гүйцэтгэх зөвлөлийн ахлах гишүүн, Япон Улсаас БНХАУ-д Элчин сайдаар сууж байсан асан Ёокой Ютака нарын албаны хүмүүстэй уулзаж, хоёр орны спортын салбарт хамтран ажиллах боломжийн талаар санал солилцлоо.

     Уулзалтын үеэр МҮОХ-ноос санаачлан хэрэгжүүлэх гэж буй "Олимпик арена" спортын цогцолбор барих төслийг танилцуулснаас гадна спортын барилга байгууламжийг байгаль орчинд ээлтэй, эрчим хүч, ашиглалтын зардал багатай барих тал дээр арвин туршлага бүхий Япон Улсын мэргэжилтнүүдээс зөвлөгөө авах, туршлага судлах асуудлыг мөн хэлэлцсэн байна.

     Япон Улсын ҮОХ-ны ерөнхийлөгч Ясухиро Ямашита нь "Лос Анжелес 1984" Олимпын наадмаас жүдо бөхийн төрөлд алтан медаль, 1979, 1981, 1983 оны жүдо бөхийн ДАШТ-ны алтан медалийг тус тус хүртэж байсан бөгөөд 2019 онд Япон Улсын ҮОХ-ны ерөнхийлөгч, 2020 оноос ОУОХ-ны гишүүнээр сонгогдон ажиллаж байна.