“Токио-2020” паралимпын 16 дахь наадам үргэлжилж байна.

Ээлжит паралимпын наадмын эрэгтэйчүүдийн -107 килограммын жинд өрсөлдсөн Монгол Улсын Гавьяат тамирчин Э.Содномпилжээ паралимпын дээд амжилтыг шинэчилж, аварга боллоо.

          Тэрбээр эхний оролдлогоороо 241 килограммыг өргөж, паралимпын дээд амжилтыг шинэчлэн тогтоосон хоёр дахь оролдлогоо 245 килограммыг өргөж, өөрийн тогтоосон дээд амжилтаа дахин шинэчилсэн юм. Гавьяат тамирчин Э.Содномпилжээ гурав дахь оролдлогоороо 248 килограммын захиалсан ч өргөж чадалгүй алдсан. Гэсэн ч өмнө нь 241 килограмм, 245 килограммын туйванг өргөж, дээд амжилтыг эвдсэн Э.Содномпилжээ илт давуу оноогоор “Токио-2020” паралимпад түрүүллээ.

          Э.Содномпилжээ “Рио-2016” паралимпад 210 килограмм өргөж, Риогийн паралимпаас хүрэл медаль хүртэж байсан билээ. Үүнээс гадна тэрбээр 2017 оны пара хүндийн өргөлтийн дэлхийн аваргаас мөнгөн медаль хүртэж, 2019 оны дэлхийн аваргаар 247 килограмм өргөж, шинэ дэлхийн дээд амжилт тогтоон түрүүлж байв. Мөн 2018 оны Азийн пара наадмаас алтан медаль хүртсэн амжилттай юм.