32 дахь удаагийн “Токио-2020” зуны олимпын наадам найм дахь өдрөө үргэлжилж байна.

Эрэгтэйчүүдийн 25 метрийн гар бууны дасгалын урьдчилсан шат өндөрлөв. Уг шатанд нийт 60 сум буудахаас өнөөдөр 30 сум буудсан байна. Монгол Улсыг төлөөлж, эрэгтэйчүүдийн 25 метрийн гар бууны дасгалын төрөлд оролцож байгаа ОУХМ Э.Даваахүү 30 сумандаа 283 оноо цуглуулж, урьдчилсан байдлаар 23 дугаар байрт жагсаж байна.

Тэрбээр найман секундэд таван сум буудах дасгалд 98 оноо авч, зургаан секунд болон багасгахад 94 оноо авсан юм. Харин дөрвөн секундэд таван сум буудах хамгийн хурдан буудлагад 91 оноо авчээ. Маргааш буюу наймдугаар сарын 2-ны өдөр 07:30 цагаас эрэгтэйчүүдийн 25 метрийн гар бууны дасгал үргэлжлэх бөгөөд финалын буудлага маргааш 13:30 цагт эхэлнэ.