Найруулагч Э.Ган-Очирын “Дасгалжуулагч” киноны зохиолд Алтан өд шагнал олгохоор боллоо. Э.Ган-Очир найруулагчийн хувьд  утга зохиол, шүүмж судлаач мэргэжлээр төгссөн бөгөөд найруулагчаар ажилласан анхны бүтээл нь “Дурсаж яваарай” кино. Тус уран бүтээлээрээ Казаны олон улсын кино наадмын шилдэг зохиолч шагнал, мөн  Их Британийн олон улсын кино наадмын шилдэг найруулагч шагналыг хүртсэн юм.

Тэгвэл оны өмнө “Дасгалжуулагч” киногоо үзэгчдэд хүргэсэн юм. Харин оны дараа мөн найруулагчаар нь ажилласан  “Бужо” олон ангит киноны нээлтээ хийж, VОО кино сангаар дамжуулан үзэгчдэд хүргэсэн билээ.

        Тэрбээр ажлын гараагаа NTV телевизээс эхэлж, баримтат киноны чиглэлд түлхүү ажиллаж эхэлсэн бөгөөд одоогоор малчин охины сурагч болсон түүхээр “Солонго” баримтат кино хийхээр ажиллаж байгаа юм. Э.Ган-очир найруулагч манай сайтад өгсөн ярилцлагадаа “Утга  зохиол, шүүмж судлаач мэргэжлээр  төгссөн минь хүний амьдралыг ойлгох, амьдралын нарийн зүйлийг мэдрэх шалтгаан болдог. Зохиол гэж ямар байх ёстой, тухайн зохиол юуны тухай өгүүлбэл хүний зүрх сэтгэлд хүрдэгийг утга зохиол судлаач мэргэжлээр суралцаж, төгссөнөөрөө ойлгож авсан. Мөн ямар зохиол, бүтээлийг унших ёстойг ялгаж, салгадаг хүн болж төлөвшсөн. Харин баримтат кино бол тухайн агшны үнэн бодит агшныг харуулж чаддаг. Тэгэхээр энэ хоёр зүйлээс суралцсан нь миний давуу тал болж байгаа” гэдгийг онцлон өгүүлж байв.