УИХ-ын ээлжит чуулганы үеэр УИХ-ын гишүүн Ц.Туваан “Би Монгол Улсын ард иргэдийн сонгосон УИХ-ын гишүүний хувиар ажлаа хийхээр ирлээ. Байнгын хорооны санал, дүгнэлтийг уншихаар цагтаа ирэхийн тулд олон саад, бэрхшээлийг давж ирлээ, Г.Занданшатар дарга аа. УИХ-ын гишүүний бүрэн эрх гэж байдаг юм уу. Шууд халдаж байна. УИХ-ын гишүүний машиныг оруулахгүй байна. Алхасаар нэг минутын өмнө орж ирлээ. Бидний яриад байсан нэг намын дарангуйлал аль хэдийн бий болжээ. Үүнийг иргэдэд хэлэх цаг нь болсон. 

ҮХЦ, СЕХ, УДШ, УБЕГ-ын орой дээр МАН гарсан нь нэгэнт тодорхой болсон байна. УИХ-ын АН-ын бүлгийн 13 гишүүн шийдвэр гаргаад талбай дээр өлсгөлөн зарлаж байна. Бидний эрхэнд шууд халдаж, доороо тавих эсгийг булааж авлаа. Ийм дарангуйлал Монголд ирсэн гэдгийг энэ индэр дээрээс хэлье. Өчигдөр албан ёсны бүртгэлтэй АН-аас СЕХ-нд материалаа өгөх гээд морин цагаас хойш 00:00 цаг хүртэл суулаа. МАН ямар дээрэлхүү юм бэ. Ардчилсан нам засаглаж байх хугацаандаа хэзээ ч ингэж байгаагүй шүү” гэлээ.