Сүхбаатар дүүргийн эрүүгийн хэргийн анхан шатны шүүхээс УИХ-ын гишүүн асан Н.Номтойбаярыг бусдыг гүтгэсэн гэж үзэн, хоёр сая төгрөгөөр торгох шийдвэр гаргажээ. Тодруулбал, Н.Номтойбаярыг УИХ-ын гишүүн Ц.Анандбазарын нэр төр, алдар хүндэд халдаж, гутаан доромжилсон худал мэдээллийг нийтэд тараан гүтгэсэн гэж үзэн, Зөрчлийн тухай хуулийн 6.21 дүгээр зүйлийн нэг дэх хэсэгт зааснаар 2000 нэгжтэй тэнцэх хэмжээний төгрөгөөр торгохоор шийдвэрлэсэн байна.

УИХ-ын гишүүн асан Н.Номтойбаяр 2019 оны нэгдүгээр сарын 10-нд Төрийн ордон мэдээлэл хийх үеэрээ “Хөшиг”-ийн хөндийн шинэ нисэх онгоцны буудалд шатахуун хадгалах агуулах барих асуудалтай холбогдуулан “У.Хүрэлсүх нь ямар ч сонгон шалгаруулалт явуулахгүйгээр Ц.Анандбазарын “Сод Монгол”-д концесс байдлаар бариулах гэрээ хийх шийдвэрийг гаргасан байдаг. Үүний дараа У.Хүрэлсүхийн хамаарал бүхий этгээд “Сод Монгол”-ын Ц.Анандбазараас 500 сая төгрөг авч байгаад баригдсан” гэж мэдэгдэж байсан юм. Тэгвэл энэхүү мэдэгдэлд нь Зөрчлийн тухай хуулийн 6.21 дүгээр зүйлийн 1 дэх хэсэгт зааснаар хэрэг бүртгэл явуулж, түүнд хоёр сая төгрөгөөр торгох шийтгэл оногдуулжээ.