Засгийн газрын Хэрэг эрхлэх газрын дарга С.Бямбацогт мэдээлэл хийлээ. Тэрбээр "Төрийн ажил тасралтгүй үргэлжлэх ёстой. УИХ бол төрийн эрх барих хууль тогтоох дээд байгууллага. Засгийн газар бол хуулийг хэрэгжүүлдэг байгууллага. УИХ-д Засгийн газраас төсөв өргөн барьсан. Улсын 2026 оны төсвийг хэлэлцэх эсэхийг шийдэх нь УИХ-ын өөрийнх нь бүрэн эрх. Цаг үеийн асуудалтай холбогдуулаад хэлэхэд Монгол Улсын Ерөнхий сайд Үндсэн хуульд заагдсан өөрийн бүрэн эрхийнхээ хүрээнд Хууль зүй, дотоод хэргийн сайдыг томилох, чөлөөлөх асуудлыг оруулж ирсэн. Өчигдөр УИХ-д танилцуулах ажлыг зохион байгуулж өгөөч гэх хүсэлтээ хүргүүлж, өнөөдөр хэлэлцэж өгөөч гэсэн. Харамсалтай нь, УИХ хэлэлцсэнгүй. УИХ энэ асуудалтай танилцчих юм бол Хууль зүй, дотоод хэргийн сайд үүрэгт ажлаа гүйцэтгээд явах бололцоо, боломж бүрдэнэ" гэв.