Ерөнхий сайд Л.Оюун-Эрдэнэ өнөөдөр мэдээлэл технологи, харилцаа холбооны салбарынхантай өглөөний уулзалтаа хийж байна. Тэрбээр "Бид цар тахлыг хамтдаа сөрж гарах хэрэгтэй байна. Тиймээс бид нэгдмэл бодлого баримталж, хамтдаа туулах хэрэгтэй. Бид цар тахлыг хэрхэн туулах цогц төлөвлөгөө танилцуулна. Энэ зөвхөн эрүүл мэндийн талаас бус эдийн засгийн талаас анхаарсан, шинэ, энгийн, идэвхтэй амьдралын хэмнэл рүү шилжих төлөвлөгөө байх болно.

Хэрхэн зайгаа барьж ажиллах вэ гэх мэтээр бид амьдралын шинэ хэмнэлд орох болно. Бид долдугаар сарын 11 хүртэл гурван удаа хөл хорио тогтоох математик тооцоолол гаргасан. Үүндээ тулгуурлаж, та бүхэн бизнесээ төлөвлөх хэрэгтэй. Ийм шинэ шилжилтэд ороход цахим шилжилт хамгийн чухал. Нэгдүгээрт, төрийн үйлчилгээг шат дамжлага багатай, хүнд сурталгүй, уялдаа холбоотой, хүнээс хамаарал багатай болгох хэрэгтэй. Тиймээс бид E-Mongolia цахим үндэстэн болох уриалга гаргаад байна. Бидэнд дэд бүтцийн тодорхой давуу талууд бий. Бид цахимаар илүү оновчтой шийдэл гаргаж, цар тахлыг даван туулж яагаад болохгүй гэж. Олон асуудлын зангилаа цахим шилжилттэй холбоотой. Жишээлбэл, замын түгжрэлийг шийдэж болно. Төрийн албан хаагчдын хэдэн машин өглөө ирээд парклаж байгаа вэ гэдгийг бид мэдэхгүй. Хэрвээ энэ бүртгэл цахимжвал өглөө, өдөр, орой гэсэн зохицуулалтаар асуудлыг шийдэх боломжтой. Ингэхдээ төрийн албан хаагчдын ажил 07:30 цагт эхэлдэг, хувийн хэвшлийнх 08:30 цаг гэх мэтээр зохицуулахад түгжрэл 25-30 хувиар буурах магадлалтай байна" гэлээ.