Хууль зүйн байнгын хорооны өчигдөр болсон хуралдааны үеэр УИХ-ын гишүүн Б.Энхбаяр “Сейфнээс нь 7.5 тэрбум төгрөг гарсан С.Батдөлийг Шүүхийн шийдвэр гүйцэтгэх ерөнхий газрын харьяа амралтад амрааж байна” гэж мэдээлсэн. Тэгвэл тэрбээр өнөөдөр сэтгүүлчид өгсөн мэдээлэлдээ “С.Батдөл Төр хурахын амралтад байгаа. Мөнгө барьдаг сайд Монголд ганцхан бий. Авлигатай тэмцэх газрын даргад “Эзэн нь өөрийгөө илчлээд өөрөө гараад ирсэн байна. Эзнийг нь шалга” гэдгээ хэлсэн. Тэр хүнийг амраагаад байна гэдэг чинь шагнаад байна гэсэн үг шүү дээ. Шүүхийн шийдвэр гүйцэтгэх байгууллагын төсвийг 2025 онд хоёр дахин хэн нэмэв, яагаад гэнэт энэ байгууллагад Сангийн яам ийм их хайртай болчихсон бэ гэхээр ойлгомжтой байгаа биз дээ” гэв.