Засгийн газрын өнөөдрийн хуралдаанаас гаргасан шийдвэрийг танилцууллаа. Энэ үеэр Боловсролын сайд П.Наранбаяр "Өнөөдөр бид Төрийн бүтээмжийн зөвлөлтэй ярилцаад боловсролын удирдлага, менежментийг авч яваа голлох дөрвөн байгууллагын хоорондын чиг үүргийн давхцалыг судалж үзлээ. Боловсролын яам, Боловсролын ерөнхий газар, Боловсролын үнэлгээний төв, Боловсролын судалгааны үндэсний хүрээлэн гэсэн дөрвөн газар. Эдгээр газарт нийт 361 хүн ажиллаж байна. Эдгээрийн газар хэлтэс, хариуцаж байгаа ажил дээр нь Засгийн газрын 22 дугаар тогтоол гэж байдаг. Үүгээр тогтоосон аргачлалын дагуу чиг үүргийн шинжилгээ хийж үзсэн. Нийтдээ 81 чиг үүрэг давхцаж байгаа нь харагдлаа. Энэ хүрээнд 73 албан тушаалыг хөдөлгөх шаардлагатай, 30 албан тушаалтанд нийт албан тушаалтны найман хувьтай тэнцэх хэмжээний хэмнэлт үүсгэх боломж байна. Нэг ёсондоо жилдээ 900 орчим сая төгрөгийн цалингийн зардлын хэмнэлтийг үүсгэж болж байна. Энэ бүхнээ өнөөдөр Засгийн газарт танилцуулсан. Бид хөдөлгөх шаардлагатай 73 албан тушаалын заримыг орон нутаг руу шилжүүлнэ" гэв.