Засгийн газрын өнөөдрийн хуралдаанаар хаврын морин уралдааныг зохион байгуулах шийдвэрийг харьяа орон нутгийн удирдлагуудад хариуцуулах шийдвэр гаргасан. Тэгвэл үүнтэй холбоотойгоор нэр бүхий УИХ-ын гишүүд Засгийн газрын шийдвэрийг эсэргүүцэн мэдэгдэл хийлээ.

Энэ үеэр УИХ-ын гишүүн М.Нарантуяа-Нара “Засгийн газар өөрсдөөсөө хариуцлагыг холдууллаа гэж харж байна. Хаврын морин уралдааныг зохион байгуулах эрхийг орон нутгийн удирдлагуудад хариуцуулна гэдэг чинь морин уралдаан зохион байгуулах эрхийг нээж өгчихөөд, өөрсдөөсөө холдуулж байгаа хэрэг шүү дээ. Хурдан морины уралдаан зохион байгуулах асуудалд эсэргүүцсэн нэг тал, нөгөө талд уяачид, зохион байгуулахыг дэмжсэн тролл хаягууд гээд хоёр хуваагдчихсан. Сүүлдээ хурдан морины уралдаан зохион байгуулахыг эсэргүүцсэн УИХ-ын гишүүдийн амь нас, үр хүүхдийг заналхийлж байна. Уг нь манай Монгол Улс “Бүхнийг хүүхдийн төлөө” гэдэг уриатай. Гэтэл тэр хүүхдүүдийн эрхийг зөрчсөн шийдвэрийг Засгийн газар гаргалаа” гэв.