Б.Ганхуягт ганц даваа үдлээ. Хоригдсон цагаасаа эхлээд хордлогод орж, хөл, гар нь мэдээгүй болж байгаагаа мэдэгдэж байсан Б.Ганхуяг хорихын харанхуй өрөөнд 760 хонолоо.

            “Эрдэнэс тавантолгой”-н захирал асан Б.Ганхуяг нүүрсний хулгайн хэргээр ял сонссон хүмүүсийн “толгойлогч” нь. Хоёр жил гаруйн өмнө түүний албан өрөө, гэрт нь нэгжлэг хийж, сүр дуулиантайгаар баривчилж байлаа. Хэчнээн удаа өргөдөл, хүсэлт бичсэн ч суллахгүй, батлан даалтад гаргахгүй байсаар шүүхийн тогтоол уншсан. Анхан шатны шүүхээс түүнд 5.9 жилийн хорих ял оноосон боловч Давж заалдах шатны шүүх 3.9 жил болгож бууруулсан билээ. Тодруулбал, Давж заалдах шатны шүүх хурал өнгөрсөн оны есдүгээр сард болж, шүүгдэгч Б.Ганхуягийн үйлдсэн хахууль авах гэмт хэрэг үйлдсэн нь тогтоогдсон, улмаар уг гэмт хэрэг үйлдэж олсон эд хөрөнгийг эдийн засгийн эргэлтэд оруулж мөнгө угаасан гэмт хэрэг үйлдсэн нь нотлогдож тогтоогдсон гэж үзсэн бөгөөд энэ талаарх анхан шатны шүүхийн дүгнэлт үндэслэлтэй, Эрүүгийн хуулийг зөв тайлбарлан хэрэглэсэн байна. Харин гэмт хэргийн замаар нэгэнт олсон эд хөрөнгө, мөнгийг өөр зүйлд захиран зарцуулж, хэлбэрийг нь өөрчлөх замаар мөнгө угаасан үйлдлийг үндэслэлгүй хөрөнгөжсөн гэж давхар зүйлчилсэн нь эрүүгийн хариуцлага гарцаагүй байх, давхардуулах хариуцлага ногдуулахгүй байх зарчимд нийцээгүйгээс гадна шүүх хэрэглэх ёсгүй хуулийг хэрэглэсэн гэж үзэх үндэслэлд хамаарч байна. Иймд шүүгдэгч Б.Ганхуягийн холбогдсон гэмт хэргүүдээс "үндэслэлгүй хөрөнгөжсөн" хэрэгт яллах дүгнэлт үйлдсэн хэрэгт яллах дүгнэлт үйлдсэнийг хэрэгсэхгүй болгож шийдвэрлэсэн байдаг.

            Хоёр жилийн өмнө.

Сүхбаатарын талбайд нүүрсний хулгайчдыг зарлахыг шаардсан иргэдийн жагсаал болж, Төрийн ордныг хамгаалтад авч байлаа. Тэгээд зогсохгүй жагсаал нь чангарч, иргэд нь нүцгэлж, нөхцөл байдал хүндэрсэн байдаг. Ингээд 40 их наядын өртөгтэй нүүрсний гэх хулгайн эрэлд монголчууд гарсан. Гэтэл нүүрсний хулгайн хэргээр ял сонссон этгээдүүд нь суллагдах өдрөө тоолж, сиймхий хүлээгээд сууж байна гэсэн үг л дээ. Өөрөөр хэлбэл, хуулиараа Б.Ганхуяг 20 сарын дараа суллагдана. Гэвч хорих ялынхаа 50 хувийг биеэр эдлэсэн тул магадлангаар суллагдах арга зам хайж, хорих ангид “түжигнэж” байгаа сурагтай.

           40 их наядын нүүрсний хулгайн хэрэгт холбогдож, шүүхээс гэм буруутай, хахууль авч, үндэслэлгүй хөрөнгөжиж, бусдад давуу байдал олгосон гэдгийг тогтоосон ч хоёр жил суугаад гараад ирэх нь тодорхой боллоо. Харин нүүрсний хулгайн хэрэг замхрах замдаа орлоо. Б.Ганхуяг, Т.Аюурсайхан нарыг нүүрсний хулгайн хэргээр хоригдсоноос хойш хэн ч нүүрсний хулгайг “ярьсангүй”.

     Б.Ганхуяг суллагдах өдрөө тоолж, сүүлчийн сумаа тавьж байхад ах, эгч, дүү нь тансаг хаусаа зарж борлуулсаар, хөрөнгө нь өссөөр байна. Харин нүүрсний хулгай замхарч, Монголын баялаг хааш урссан нь, хэний халаасанд орсон нь “тодорхой”-гүй бүдгэрчээ.

Б.Ганхуягтай холбоотой бүрэн баримтыг энд дарж унших боломжтой. https://ergelt.eccold.top/news/1/single/34020