“Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай” Улсын Их Хурлын тогтоолын төслийн анхны хэлэлцүүлгийг хийж байна.

       Хэлэлцүүлж буй асуудалтай холбоотой гишүүд асуулт асууж, хариулт авч байна. 

УИХ-ЫН ГИШҮҮН Ж.БАЯРМАА: 14 мега төслөөс хамгийн ач холбогдолтойг ярьж байгаа нь маш зөв."Төмөр замын алдагдсан боломжийг яриад яах вэ, хаая" гээд байна. Тэрийг ярихгүй байж болохгүй. Үр хойчдоо сургамж болох асуудал. Гэтэл Монгол Улс 2015-2023 он хүртэл  232 сая тонн нүүрс төмөр замаар экспортод гаргах боломжтой байжээ. Энэ 18.5 тэрбум ам.доллар буюу 63.8 их наяд төгрөг байсан. Ийм зүйлийг ярихгүй байж болохгүй. Ганцмодны боомт хөгжиж байгаа юм билээ. Гашуунсухайтын боомтын хөгжлийг яаж тодорхойлсон бэ. Дээр нь төмөр зам ашиглалтад орсноор хэдэн жолооч ажилгүй болох эрсдэлтэй байна вэ. 2030 оноос хоёр шинэ орд нээнэ. Онч хараа, Бортолгой. Үүшний өртөгийг зөв тооцож чадсан уу.

ЗАМ ТЭЭВЭР, ХӨГЖЛИЙН САЙД Б.ДЭЛГЭРСАЙХАН: Бид урд хөршийн алдагдсан боломжийг яриад байдаг. Өөрсдийнхөө алдагдсан боломжийг ярих нь зөв. Гашуунсухайт боомт цаашид тосгон болж хөгжинө. Өнөөдрийн байдлаар Гашуунсухайт боомтод 10 мянган иргэн амьдарч байна. Энэ боомт дээр 20 мянган машин бүртгэлтэй байдаг. Газар дээрээ 7800 машин явж байна. 3500 жолооч ажиллаж байгаа. Цаашид жолооч нарын тоог нэмэх, төмөр замтай болсон ч машинаар нүүрс гаргах хэмжээгээ бууруулахгүй. Гашуунсухайт-Ганцмодны боомт дээр төрийн үйлчилгээг хүргэх, амьдрах орчныг сайжруулна. Бүтээн байгуулалтын ажлаа хамт авч явна.