Эрчим хүчний зохиуццлах хорооноос цахилгаан, дулааны үнэд өөрчлөлт оруулсан талаар мэдээлэл хийлээ.

Энэ талаар Эрчим хүчний зохицуулах хорооны дарга Э.Түвшинчулуун "Эрчим хүчний салбарт олон хүндрэлтэй асуудал бий. Тэр дундаа санхүү, эдийн засгийн асуудал хүнд байна. Учир нь цахилгаан дулааны үнийг өөрийнх нь үйлдвэрлэсэн үнээс доогуур буюу алдагдалтай үнээр борлуулж байгаатай холбоотой салбарт их хэмжээний алдагдал үүсэж байна. Энэ нь эрчим хүчний салбрын хэвийн үйл ажиллагааг явуулахад хүндрэлтэй болж байгаа юм. Нөхцөл байдлыг сайжруулах үүднээс үнэ тарифын асуудлыг авч үзэхээс өөр аргагүй байна. Нэгдүгээрт, цахилгаан дулааны үнийг өөрийн өртөгт ойртуулах арга хэмжээ авсан. Энд ямар нэг ашиг тооцогдоогүй. Хоёрдугаарт хэрэглэгчдэд санхүүгийн ачаалал нэмэхгүй байхыг бодолцсон.

Дулааны эрчим хүчний үнэ тарифыг тавдугаар сарын 15-наас мөрдөнө. Аж ахуйн нэгж байгууллага, айл өрхүүд энэ жилдээ хуучин үнээр явна. Цахилгаан эрчим хүчний хувьд аж ахуйн нэгж байгууллагуудын цахилгааны үнийг 30 хувиар нэмэгдүүлж байна. Айл өрхүүдийн хувьд хэд хэдэн шинэ аргачлалыг оруулж байна. Нэгдүгээрт, хэрэглээнээс хамаарсан үнэ төлбөрийг төлнө. 0-150 квт.ц хэрэглээг 140 төгрөгөөр тооцож байгаа бол 175 төгрөг болгож тооцно. 150-300 квт.ц хэрэглээг 260 төгрөгөөр, 300 илүү гарсан хэрэглээг өртөгт нь хүрч байгаа үнэ буюу 250 төгрөгөөр тооцохоор болсон. Жишээлбэл, тухайн айл өрх сард 350 квт.ц цахилгаан эрчим хүч хэрэглэсэн бол эхний 150-ыг нь 175 төгрөгөөс 50-300 квт.ц хэрэглээг 260 төгрөгөөр, 300 илүү хэрэглэсэн бол 285 төгрөгөөр шаталсан хэлбэрээр тооцож явах юм. Цаашид хэрэглээг багасгах арга хэмжээ авч байна. Мөн бид оргил ачааллын тариф гэж шинээр гаргаж ирж байна. Цахилгааны үнийн нэмэгдлийг өнөөдрөөс дагаж мөрдөнө" гэлээ.