УИХ-ын чуулганы нэгдсэн хуралдаанаар Боловсролын багц хуулийн төслийн анхны хэлэлцүүлгийг хийж байна. Хуулийн төсөлтэй холбоотой УИХ-ын гишүүд асуулт асууж, хариулт авч байна.

УИХ-ЫН ГИШҮҮН Б.БАТТӨМӨР: Боловсролын асуудалд эцэг, эхийн боловсролын асуудал чухал. Сургуулийн өмнөх боловсролд ачааллыг нь багасгах судалгаа байдаг. Манайд ийм судалгаа байна. Бүх шатны сургалтад монгол ямар агуулга байна. Боловсролд оруулж байгаа санхүүжилт ДНБ-ний хэдэн хувьд багтдаг вэ. Эдийн засгийг баталгаажуулах ямар өөрчлөлт энд байгаа бол.

БОЛОВСРОЛ ШИНЖЛЭХ УХААНЫ САЙД Л.ЭНХ-АМГАЛАН: Ажилгүйдлийн түвшний асуудал боловсролд зарцуулсан хөрөнгө оруулалтын мөн. Өнөөдөр ДНБ-ний 4.2 хувьтай тэнцэх хөрөнгийг боловсролд зарцуулж байна. 2.2 их наяд гэсэн үг. Урсгал төсвийн 16 хувийг зарцуулж байна. Нэг сурагчид 500 орчим ам.долларын зардал ногдож байна. Энэ сайн үзүүлэлт хэдий ч нэг сурагчид ногдож байгаа хөрөнгө маш бага байгаа юм. Иймд боловсролын санхүүжилтийн тогтолцоог энэ хуулиар өөрчилнө. Хөдөлмөрийн зах зээлд гажуудал үүссэн. Ажилгүй 100 гаруй мянган иргэний дунд 35-аас доош насны дээд мэргэжилтэй залуус зонхилох хувийг эзэлж байна.

Эцэг эхийн боловсролын төвшингөөс хүүхдийн боловсролын төвшин шууд шалтгаалдаг үзүүлэлт байдаг. Ерөнхий боловсролын тогтолцоо 12 жилийн тогтолцоотой болгосон.

УИХ-ЫН ГИШҮҮН Ц.ДАВААСҮРЭН: Энэ бол чухал хууль. Хоёр том гүрний дунд амьдарч байгаа манай улсын иргэд боловсролтой байх нь чухал. Том улсууд мөнгөний хэмжээгээр ялгаж салгаад явчихдаг. Манайд хуучин оросын элит тогтолцоо хамгийн тохиромжтой. Үүний агуулга стандартыг өөрчилж болохгүй. Боловсролын гол асуудал нь ёс суртахуунтай иргэн бэлтгэх. Сургалтын агуулга бэлдэнэ гэдэг хамгийн чухал. Хуучин шинжлэх ухаанд үндэслэн эрдэмтэд бэлтгэдэг байлаа. Сүүлд багш нар бэлтгэх нь сайн гээд өмнөхөө нураасан. Үндсэн хуулийн 16.7 Ерөнхий боловсролын сургалтыг үнэгүй болгоно гэж байгаа. Үр дүнд суурилсан сургалт бэлтгэнэ гэдэг сүүлдээ хувийн хэвшлийг дэмжинэ шүү. Хувийн хэвшлийг дэмжих нь боловсрол, эрүүл мэндийн салбарыг үгүй хийдэг. Санхүүжилтийн тогтолцоонд анхаарахгүй бол болохгүй.

БОЛОВСРОЛ ШИНЖЛЭХ УХААНЫ САЙД Л.ЭНХ-АМГАЛАН: Энэ Засгийн газраас өргөн мэдүүлсэн хууль. Тиймээс Засгийн газрын гишүүд нэг зарчим дээр байх болов уу гэж бодож байна. Засгийн газар үр дүнд суурилсан санхүүжилтийн тогтолцоог эрүүл мэнд, боловсролын салбараасаа эхлүүлнэ гэж байгаа. Энэ бол Л.Оюун-Эрдэнийн Засгийн газрын гол реформ. Үүнээсээ нэг алхам ч ухарч болохгүй. Засгийн газрын гишүүн өөрөө ийм буруу ойлголт төрүүлж болохгүй.