Завхан аймгийн Засаг дарга Д.Түвшинжаргал өнөөдөр тамгаа гардан авлаа. Өнгөрсөн дөрвөн жил тус аймгийн Засаг даргаар Д.Батсайхан ажиллаж байсан юм. Тэрбээр аймгийн шинэ Засаг даргадаа амжилт хүсээд эхлүүлсэн ажлыг нь үргэлжлүүлэх, хамтарч ажиллахыг санууллаа. 

Энэ үеэр аймгийн шинэ Засаг дарга Д.Түвшинжаргалаас нэн тэргүүнд хийхээр төлөвлөсөн ажлын талаар нь тодруулахад “100 жилийн түүхтэй Завхан аймгийг 100 жилийн босгон дээр нь хүлээж авч, өндөр хариуцлагатай албанд томилогдож байна. Завхан аймгийнхаа хөгжил дэвшлийн төлөө хичээн ажиллана. Дэлхий даяар тархсан халдварт өвчнөөс хамгаалах ажил бол нэн тэргүүний чухал ажил байна. Улаанбаатар хотоос иргэд маань ирэх гэж байна. Хүний амь нас, эрүүл мэнд яригдаж байгаа учраас хариуцлагатай зохион байгуулах хэрэгтэй болж байна. Ирэх жилүүдэд Завханы иргэдийн маань амьдрал сайжирсан байх ёстой гэсэн чин хүсэл байна. Шийдэх олон асуудал байна. Үйлдвэрлэл, үйлчилгээ хөгжих ёстой. Иргэд ажлын байртай болох хэрэгтэй байна. Уул уурхайгаас ангид аймаг болгох зорилт тавьсан өмнөх Засаг даргынхаа ажлыг үргэлжлүүлнэ. Бид онгон дагшин байгалиа хамгаалах ёстой. Уул уурхайн лиценз, зөвшөөрөл хэзээ ч олгохгүй гэсэн байр суурьтай байна” гэлээ.