УИХ-ын гишүүн Д.Батлут Сар шинийн баярын өдрүүдэд Орхон аймагт тойрогтоо ажиллах үеэрээ  хүндэтгэл нэрээр иргэдэд бэлэн мөнгө тараасан байж болзошгүй асуудлар хуулийн байгууллагад шалгуулж эхэлсэн гэх мэдээлэл бий. Эх сурвалжийн мэдээлж буйгаар тэрбээр иргэдэд 20 мянган төгрөг дугтуйд хийж тараасан гэх мэдээлэл өгөөд байгаа юм. Энэ талаар бид УИХ-ын гишүүн Д.Батлуттай холбогдож тодруулахад "Надад тийм мөнгө тараасан асуудал байхгүй. Хуулийн байгууллагад шалгуулж байгаа зүйл ч байхгүй. Хэрэв тийм асуудал байгаа бол шалгуулахад бэлэн" гэх тайлбар өглөө.

      Өөр нэг эх сурвалжийн мэдээлснээр “УИХ-ын гишүүн Д.Батлут тойргийнхоо иргэд, сонгогчдод зурагт мэндчилгээ, өөрийнхөө хийсэн ажлын тайлан, 20 мянган төгрөг тараасан байна лээ. Хахууль өгч байгаа энэ үйлдлийг нь иргэд зургаар баримтжуулж авсан байсан. Энэ бол баримтгүй гүтгэлэг биш, баримттай хахууль маш ноцтой асуудал. Хууль хяналтын байгууллагынхан тойргийнхоо иргэдийг мөнгөөр хуурч, хахууль өгсөн гишүүдийг шалгаасай билээ. Засгийн газрын Шүүр ажиллагааг УИХ-ын гишүүдээс эхлүүлэх нь зүйтэй. Гишүүд нь авлига өгөөд, сандал суудлын төлөө одооноос бэлдэж эхэлж байна шүү дээ. Тэгэхээр хажуудах хүмүүсээс л ажиллагаагаа эхэлж, цэвэрлэх хэрэгтэй байна. Д.Батлут 20 мянган төгрөгөөр л өөртөө давуу байдал олгож байна” гэсэн юм.