Кибер аюулгүй байдлын тухай хууль батлагдсантай холбогдуулан ЗГХЭГ-ын дарга Ц.Нямдорж, Хууль зүйн сайд Х.Нямбаатар болон ажлын хэсгийн гишүүд мэдээлэл хийлээ. Энэ үеэр Хууль зүйн сайд Х.Нямбаатар "Засгийн газраас өргөн мэдүүлсэн цахим шилжилтийг хийхэд шаардлагатай байгаа хуулийг УИХ-аас эцэслэн баталлаа. Нийтийн мэдээллийн ил тод байдал, Хувь хүний мэдээллийг хамгаалах, Цахим гарын үсгийн, Кибер аюулгүй байдал, Виртуал хөрөнгийн үйлчилгээ үзүүлэгчийн тухай хуулийг тус тус эцэслэн баталсан. Ингэснээр цахим үндэстэн болох хууль эрх зүйн орчин бүрдлээ. Эдгээр хууль ирэх оны тавдугаар сарын 1-ээс үйлчилж эхэлнэ.

    Нийтийн мэдээллийн ил тод байдлын хууль батлагдсанаар Газар зохион байгуулалт, төлөвлөлт түүнд оруулж буй нэмэлт өөрчлөлт, газар эзэмшигчийн бүх төрлийн мэдээлэл, төрийн болон төрийн өмчийн оролцоотой хуулийн этгээдийн гүйцэтгэх удирдлагын үйл ажиллагаа, шинээр баригдаж байгаа барилгыг улсын комисс хүлээж авах, ашиглалтад орох, тусгай хамгаалалттай нутаг дэвсгэрт олгосон газар ашиглах гэрчилгээ байгуулсан гэрээ газар ашигласны төлбөр, улс төрийн намын дүрэм, гишүүнчлэл, хандив, давамгай байдалтай аж ахуй эрхлэгчийн үнийн бүрдэл, төрийн сангийн зардлаар гадаадад сурах хүүхдүүдийн мэдээллийг ил болгоно” гэлээ.