УИХ-ын нөхөн сонгуулийн үр дүнгээр 18 дугаар тойрогт нэр дэвшиж ялалт байгуулсан Ц.Идэрбат УИХ-ын гишүүний тангаргаа өнөөдөр өргөсөн. Тэрбээр гишүүний тангаргаа өргөсний дараа сэтгүүлчдэд мэдээлэл өгсөн юм.

-Та Хэнтий аймгийн Засаг даргаар ажиллаж байгаад УИХ-ын гишүүнээр сонгогдоо. Хийж хэрэгжүүлэхээр төлөвлөж байгаа ажлуудаасаа танилцуулахгүй юү?

          -Нөхөн сонгуулийн дүн баталгаажин УИХ-ын гишүүний тангарагаа өргөснөөр өнөөдөр анхны чуулганы хуралдаандаа суулаа. Улс орон, ард түмний эрх ашгийг дээдлэнэ гэдэг зарчим баримтална. 

-Та намынхаа гишүүдийн дэмжлэгээр УИХ-ын гишүүн боллоо. Гэвч сонгуулийн ирц 50 хувьдаа хүрээгүй шүү дээ?

          -Сонгуулийн ирцтэй холбоотой асуудлыг СЕХ-ноос асууж тодруулах нь зүйтэй байх.  Сонгуулийн дүнтэй холбоотой асуудалд байр суурь илэрхийлэх нь миний хувьд зохимжгүй.

-Та хууль тогтоох дээд байгууллагад орж ирлээ. Хамгийн эхэнд ямар хуулийн төсөлтэй танилцсан бэ?

-Энэ оны арваннэгдүгээр сарын 15-наас өмнө Монгол Улсын төсвийн тухай хууль батлах ёстой. Тиймээс энэ хуульд анхаарах ёстой гэж ойлгож байгаа.

-Сүүлийн жилүүдэд Хэнтий аймагт хамгийн өндөр төсөв төсөвлөж байна гэх шүүмжлэл бий. Ирэх онд танай аймагт хэдэн төгрөг төсөвлөсөн бэ?

          -Сүүлийн жилүүдэд Хэнтий аймагт хөрөнгө оруулалт нэмэгдэж байгаа нь үнэн. Хэнтий аймгийг түүхэн аялал жуулчлалын бүс болгох шийдвэрийг Засгийн газраас гаргасан. Засгийн газраас бодлогын түвшинд гаргаж байгаа шийдвэрүүд  амьдрал дээр хэрэгжиж байгаагийн илрэл гэж харж байгаа. 

-Хоёр тэрбум төгрөгөөр Андлалын хөшөө бариад, түүнийгээ нураасан нь Засгийн газрын бодлого гэж ойлгож болох уу?

          -Бүх зүйлд яг одоо хариулна гэж байхгүй.  Аялал жуулчлалыг хөгжүүлэх хүрээнд Хэнтий аймагт хийж байгаа ажлуудын талаар танилцуулах боломж дараа нь гарах байх. Дөнгөж эхлээд нураасан Андлалын хөшөөг яриад яах вэ. Ярих боломж олон гарах байх. Энэ бол хуучин сэдэв болчихсон. Би хэвлэлд нээлттэй гишүүн байна. Тэр үеэрээ ярих боломж олдох байх.