Утга зохиол судлаач, шүүмжлэгч, сэтгүүлч У.Бямбаням "Дурсамжийн газрын зураг" номоо гаргажээ. Энэ нь түүний анхны хүүрнэл хэлбэрийн бүтээл бөгөөд 1926-1930 онд Германд суралцсан монгол сурагчид болон зохиолч Д.Нацагдоржийн тухай "Найрагчийн мөрөөр" медиа төслийн хүрээнд хэвлэсэн байна. Өмнө нь тэрбээр "Анир гүм" яруу найргийн ном, "Цаг хугацаа хэлнэ" уран зохиолын эсээний түүвэр, "Хишиг: Монголчуудын нүгэл төөрүүлэх зан үйл" судалгааны бүтээл болон шүүмжийн хамтын бүтээлүүд хэвлүүлж, "Музей" цуврал, "Домог" зэрэг хүүхдэд зориулсан 10 номын зохиолчоор ажиллажээ. Ингээд  "Дурсамжийн газрын зураг" номоос онцлох эшлэлийг уншигч танд хүргэе.

• "Яг таван жил, гурван сар, арван хоёр хоног. Намрын сүүл сарын сэвхийх салхигүй, налгар өдөр цонхоор тусах нарны элчинд нозоорч, модон сандалд хөлөө ачиж суугаад ном уншиж байхад хаанаас ч юм харван орж ирсэн санааг таван жил, гурван сар, арван хоёр өдрийн дараа л гүйцэлдүүлэхээр шийдлээ..."

• "...Тэр өдрөөс хойш тогтсон цагтаа архивт очиж, баримтуудыг шүүдэг ажилтай боллоо. Он цагийн уртад хатаж шарлаад, гар хүрэх төдийд үйрч унахад бэлэн болсон бор цааснууд этгээд сонь үнэртэй. Хэрэв цаг хугацаанд үнэр гэж байдаг бол тэр нь энэ байх...​"

• "...Таван жил, гурван сар, арван хоёр хоногийн өмнө ном уншиж суусан тэр өдөр би зуун жилийн өмнө Баруун Европт сурахаар явсан зохиолч Дашдоржийн Нацагдоржийн мөрөөр мөшгихөөр шийдсэн юм. Тэгэхэд гэж дурсах шалтгаангүй жирийн л өдөр байсан хэр нь он, сар, өдрийг сайн санаж байна. Галт тэрэг хөдөллөө..."

• "...Галт тэрэг зугуухан мөлхсөөр хотыг зорив..."

• "...Нэг л мэдэхэд гэрлийн эрчис дунд шидэгдэн хотын дээгүүр эргэлдэн нисэж явлаа..."

​

• "...Хүмүүс нарыг зүхэж, бороо хүлээдэг хэр нь өдрийн хугас оров уу, үгүй юу л уйдчихдаг. Хүний хүслээр байвал энэ дэлхий ертөнц юу л болж хувирах бол оо..."

•  "...Би одоо юунаас болгоомжилно гэж. Одоо би болгоомжлохоор хүнд хэрэгтэй хүн гэж үү? Салаад явж байхад ингэж л бодогдсон..."

•    "...Даарч, бас өлсөж байгаа болохоор байр луугаа эргэхээс өөр арга алга. Цонхоор Санкт-Петербургийг ширтэж явна. Таксинд удаан хөг хэмтэй орос дуу явж байв. Буддын сүмийн хажуу дахь дотуур байранд болдог намын үүрийн хурал тарсан монгол оюутнууд Д.Нацагдорж, Пагмадулам хоёрыг гаргаж өгөхөөр Шинэ тосгоны галт тэрэгний буудал хүртэл алхаж, тэр хавийн шар айргийн газар орж, элдвийг ярилцаж орой болтол суухад Д.Нацагдорж "Хандармаа", "Цэнхэрлэн харагдана" зэрэг дууг аяланхан суудаг байсан тухай дурсамж санаанд орлоо..."

• "...Маргааш өглөө нь босоод иртэл цонхны цаана том том ширхэгтэй цас лавсан орж байв. Төв замууд цасанд хучигджээ..."

​

• "...Чамайг нутаглуулчихаад морин тэрэгний арал дээр хөндөлдөн суугаад уруудаж явахдаа чамтай өнгөрүүлсэн өдөр хоногуудаа нэхэн санасан минь энэ..."

• "...Би харин хотыг биш өөрийнхөө өнгөрснийг, хэзээ ч эргэж ирэхээргүй орхин одсон дурсамжуудаа хайж буй мэт юуг ч юм нэгжин харж зогслоо..."

• "...Тал бас цаг хугацаа, орон зайн хувьд хүнийг тайвшруулж уужуу тайван, нөгөөтээгүүр салан назгай болгодог газар..."

• "...Одоо бодоход цаг хугацаа гэдэг ердөө л нэг зүйлийг нөгөөгөөс зааглахаар бүтээсэн пансан алчуур төдий аж..."

• "...Дурсамжийг хэн ч, хэзээ ч алга болгож дөнгөхгүй нь эндээс мэдрэгдэнэ. Дурсамжуудыг мартлаа гэж бодоход хэзээ нэг өдөр бидний санаанд оромгүй газраас, санаанд оромгүй үе амилан босож ирээд чиний бодит, биет гэж чухалчилж буй амьдралд чинь оролцож эхлэх вий..."