Монгол Улсын Төрийн соёрхолт, Соёлын гавьяат зүтгэлтэн, яруу найрагч Ц.Бавуудоржийн "Дилова хутагт" түүхэн романы нээлт өнөөдөр боллоо. Тэрбээр 1990 оноос уран бүтээлийн гараагаа эхэлж, "Бүгээн анир", "Гүмүда" зэрэг шүлгийн номоороо найргийн ертөнцөд хөл тавьж байжээ. Үргэлжлүүлэн "Монголын их амар амгалан", "Дорно зүгт өвс болно", "Дотоод сансар", "Уянгын шүлгүүд" зэрэг ном хэвлүүлсэн юм.

                 "Түүний шүлэгт өвс яруусаж, уулс гэрэлтэж, морьтой хүн явж, өрнө, дорно хоёр мөрөн дээр нь завилж, дөрвөн улирал болж, эр хүн ятгатай дуулна. Товчхондоо ахуй орчны юмсыг мэдэрч, гүн гүнзгий утга агуулгыг гаргаж ирснээрээ, чухамхүү биднийг тойроод амгалан зүйлс их байна гэдгийг бусдад мэдрүүлэхийн төлөө тэр бичиж, түүнийг нь төр соёрхсон. Нар, сар, огторгуй, цагаан гэгээ, манант үдэш гээд хүн болоод юмсын гэрэлтэй, гэгээтэй бүхэн түүний шүлэгт оршино..."