Монсудар хэвлэлийн газар Германы зохиолч Юдит Шаланскийн "Алдагдсан зүйлсийн жагсаалт" номыг Монгол хэлнээ хөрвүүлэн гаргажээ.  Юдит Шаланский (1980 онд Грайфсвальд хотод төрсөн) зохиолч төдийгүй, номын дизайнер, хэвлэн нийтлэгч билээ. Бичиж туурвисан номуудынхаа хавтас, гадар, дотор дизайныг тэрээр бүгдийг нь өөрөө гардан хийдэг бөгөөд үүгээрээ ч олны анхаарлыг багагүй татдаг юм. Алслагдсан арлуудын атлас хэмээх утга зохиол, үзүүлэн таниулах бүтээлээрээ тэрээр дэлхийн утга зохиолын ертөнцөд алхан оржээ. Түүний хамгийн сүүлд туурвиж, өөрөө бие даан загвар дизайныг нь гаргасан "Алдагдсан зүйлсийн жагсаалт" хэмээх шинэхэн бүтээл ч бас агуулга, концепцын хувьд нэгэн ил тод шугамыг дагана. Тус түүвэрт багтсан 12 өгүүллэг хүмүүс, амьтад, барилга байшин, бүлэг арал, урлагийн бүтээлүүд гэх мэтчилэн нэгэн цагт оршин байгаад янз бүрийн шалтгаанаар алдагдан үгүй болсон зүйлсийн тухай өгүүлэх аж.