Зохиолч, яруу найрагч М.Уянсүхийн "Хонхот хүүхэлдэй" роман хэвлэлтээс гарчээ.

      Тус романд"...Би усгүй хаягдсан загас биш. Миний ус бохирдсон тул цэнгэг ус үгүйлэн тарчилж байгаа юм. Би уулнаас хөөгдсөн даяанч биш. Миний уул манантай тул цаст оргилоо хараачлан зүдэж яваа юм. Би замаас төөрсөн тэнүүлч биш. Миний зам олон салаалсан тул алийг нь дагахаа мэдэхгүй тээнэгэлзэн зогсоо юм. Би хайраас гээгдсэн ганцаардагч биш. Миний хайр охь дээжээ задлаагүй тул түүгээр дутан гансарч суугаа юм. Тиймээс би бохир усандаа дасмааргүй байна. Тиймээс би мөнхийн манан дунд баймааргүй байна. Тиймээс би дороо тээнэгэлзэн зогсмооргүй байна. Тиймээс би хэрхэвч гансран суумааргүй байна. Гэвч, цэнгэг ус гүнээс бургилан ундардаг. Тэр гүнийг яаж олох вэ? Цаст оргил тэнгэрийн цэлмэгт гялалздаг. Тэр цэлмэгт яаж хүрэх вэ? Салаа замуудаас нэг нь тодорч танигддаг. Тэр замыг яаж таних вэ? Охь дээж нэг л өдөр задардаг. Тэр өдрийг хэрхэн үзэх вэ?..." гэсэн олон асуулт бий аж. 

    Тэрбээр Увс аймгийн Улаангом суманд төрсөн бөгөөд 1990-ээд оноос уран бүтээл эхэлж яруу найраг, хүүрнэл зохиол, эсээ чиглэлээр туурвидаг. 2006 онд "Асагч сарны шүлгүүд" номоороо Монголын залуучуудын эвлэлийн шагнал, 2008 онд "Яруу найрагч он цаг", 2014 онд "Айшхи", 2019 онд "Аварга мод" бүтээлээрээ Алтан өд шагнал хүртсэн юм. Тэрбээр "Аварга мод" романаа хамгийн удаан хугацаанд бичсэн байдаг.