Сингапур Улсад энэ сарын 13-23ны хооронд цахимаар зохион байгуулагдсан мэдээлэл зүйн Олон Улсын 32 дугаар олимпиадад Монгол Улсаа төлөөлөн оролцсон А.Нямдаваа амжилттай оролцож, алтан медаль хүртжээ. Тус олимпиадаас Монгол Улс анхны алтан медаль авсан нь энэ юм.

Мэдээлэл зүйн олон улсын олимпиадад Монгол Улс 1991 оноос хойш оролцож байгаа бөгөөд гурван хүрэл, нэг мөнгөн медаль авсан байдаг. Харин энэ жил анхны алтан медалийг авчирч, амжилтаа ахиулаад байна.

А.Нямдаваа нь 2019 онд Азербейжан Улсын Баку хотноо болсон 31 дүгээр олимпиадаас манай улсын анхны мөнгөн медалийг авч байсан аж. Сингапур Улсын их сургууль алтан медаль авсан оролцогчдодоо тэтгэлэгтэй сурах санал тавьсан гэдгийг монголын багийнхан дуулгалаа.