Сингапур Улсад Энэтхэгт бүртгэгдсэн коронавирусийн шинэ хувилбар тархаж, насанд хүрээгүй хүүхдүүд илүүтэй өртөж буй тул энэ долоо хоногоос сургуулиудыг хааж, өсвөр насны хүүхдүүдийг дархлаажуулах ажлыг эхлүүлнэ хэмээн тус улсын эрх баригчид мэдээллээ. Энэ сарын 28-ныг дуустал бүх шатны сургуулийг амралт эхэлтэл гэрээсээ хичээллэх чиглэл өгсөн байна.

Тус улсын Боловсролын сайд Чан Чун Син “Эл вирусийн шинэ хувилбар хүүхдүүдэд илүү халдварлах магадлалтай байна” хэмээв. “Тийм хэдий ч халдвар авсан хүүхдэд хүндээр өвдөх болон өвчний шинж тэмдэг илрээгүй” хэмээн нэмж хэллээ.

Ням гарагт Сингапурт 38 хүнээс коронавирусийн халдвар илэрсэн бөгөөд есдүгээр сараас хойш бүртгэгдсэн хамгийн өндөр үзүүлэлт болжээ. Сургалтын төвд кластер халдвар тархаж, дөрвөн хүүхдээс коронавирусийн халдвар илэрсэн бөгөөд шинж тэмдэггүй учир ахин хэдэн хүүхэд халдвар авсан нь тодорхойгүй байна.

“Коронавирусийн шинэ хувилбарын B1716 мутаци нь хүүхдүүдэд илүү халдварлах чадвартай байна” хэмээн тус улсын Эрүүл мэндийн сайд Он Е Кун мэдэгджээ. Сингапурт нийт 61 мянган хүнээс коронавирусийн халдвар илрээд буй бөгөөд 31 хүн халдварын улмаас нас баржээ.