АНУ-ын Флорида мужид зохион байгуулагдаж буй “Miss Universe” тэмцээний оролцогч Мьянмарын мисс Тюзар Винт Лвин өнгөрсөн ням гарагт Мьянмарт төрийн эргэлт хийсэн цэргийн хүчнийхний эсрэг дуу хоолойгоо өргөхийг уриалжээ.

Тэрбээр тэмцээний сүүлчийн шатанд оролцох үедээ “Манай ард түмэн өдөр бүр цэргийнхэнд буудуулж амиа алдаж байна” хэмээв.

“Би хүн бүр Мьянмарын нөхцөл байдлын талаар яриасай гэж уриалмаар байна. Мьянмарыг төлөөлж буй миссийн хувьд би чадах чинээгээрээ дуу хоолойгоо хүргэмээр байна” хэмээн тайзан дээр олны өмнө дуу хоолойгоо илэрхийлэв.

Мьянмарт төрийн эргэлт гарснаас хойш 800 гаруй хүн амиа алдаж, 5000 гаруй хүнийг баривчлаад байна. Мьянмарын мисс Тюзар Винт Лвин нь тэмцээний сүүлчийн шатанд шалгарч чадаагүй ч үндэсний шилдэг хувцаслалтын шагналыг хүртсэн билээ. Тэрбээр үндэснийхээ хувцсыг өмсөн “Мьянмарын төлөө залбираарай” гэсэн лоозон барьжээ.