БНХАУ-ын нийслэл Бээжин хотод байгалийн аюулт үзэгдэл учирч, элсэн шуурга дэгдэж байгаатай холбоотойгоор эрх баригчид гамшгийн дөрвөн түвшний хоёрдугаар буюу шар түвшний онц байдал зарлажээ. Эх сурвалжийн мэдээлж буйгаар өчигдөр буюу гуравдугаар сарын 14-нд Монгол Улсын орон даяар үзэгдсэн шуурга Бээжин хотыг дайраад байгаа аж.

         Хятад Улсын Цаг уурын үндэсний төвөөс уг элсэн шуурга маргаашийн 08:00 цаг хүртэл Шинжаан, Өвөрмонгол, Мөрөн, Жилин, Ляонин, Ганьсу, Нинся, Шэньси, Шаньси, Хэбэй, Бээжин, Тянжинь орчмын газар нутгийг хамрах төлөвтэй байгааг урьдчилсан мэдээгээр олон нийтэд зарлажээ. Мөн тус төвөөс хүчтэй салхи салхилж, элсэн шуурга дэгдэх тул олон нийт, жолооч нарт бэлтгэлтэй байх анхааруулга, зөвлөгөө өгсөн байна.

Эх сурвалж: XINHUANET