БНАСАУ-ын хакерууд Америк, Германы хамтран үйлдвэрлэж буй “Пфайзер” вакцины мэдээлэлд халдаж, вакцин бүтээсэн технологийг нь хулгайлахыг завдсан тухай БНСУ-ын тагнуулын албанаас мэдээлжээ. Өмнөд Солонгосын тагнуулын хорооны хуралдааны үеэр зарласан уг мэдэгдлийн үеэр “Хойд Солонгос нэг бус удаа мэдээллийг нь хулгайлахыг оролдсон” хэмээсэн юм.

     Хакерууд БНАСАУ-ын нийслэл Пёньян хотоос халдсан ч мэдээлэл хулгайлах оролдлого амжилттай болсон эсэх нь одоог хүртэл тодорхойгүй байгаа бөгөөд уг мэдээлэлд “Пфайзер” компаниас хариу мэдэгдэл хийгээгүй байгаа юм. Мөн тус улсын хакерууд цахим сүлжээг доголдуулж, интернэтэд эргэлддэг мөнгөнөөс жилд дунджаар 316 сая ам.доллар цөмийн зэвсгийн хөтөлбөрт зориулан залилдаг аж.