БНХАУ-ын Төвөдийн өөртөө засах орны Тингри Шян нутагт их хэмжээний цас орж, шуурсны улмаас Эверест ууланд цасанд боогдоод байсан 1000 орчим уулчныг амжилттай нүүлгэн шилжүүлжээ. Тодруулбал, дэлхийн оргил гэгддэг Эверест уулын орчимд цасаар шуурч, гамшгийн түвшинд хүрээд байгааг орон нутгийн хэвлэлүүд мэдээлсэн. Үүний улмаас Эверест ууланд авирч байсан гаднын аялагч, жуулчин, орон нутгийн ажилчин, малчид цасан шуурганд боогдоод байсан юм. Тэгвэл “CCTV”-гийн шинэ мэдээллээр Эверест ууланд цасанд боогдсон 580 явган аялагч, 300 гаруй малчин, орон нутгийн ажилтныг аварч, ойролцоох хотод нүүлгэн шилжүүлээд байгаа аж. Цасан шуурганаас аврагдсан уулчин, малчид цас их хэмжээгээр орж эхлэх үед авч явсан багаж хэрэгсэл, хоолны тогоо, аягаараа цас ухаж, дотор нь хорогдсоноор шуургыг өнгөрөөж чадсан гэнэ.

      Түүнчлэн Эверест уулын орчимд одоог хүртэл эрэн хайх, аврах ажиллагаа явуулж байгаа ч цас үргэлжлэх орж байгаагийн улмаас ажиллагаа саатаад байгаа бөгөөд нэг уулчны цогцсыг олж буулган, эрлийг цааш үргэлжлүүлж байгаа юм байна.