Монгол Улсын Сайд, Засгийн газрын хэрэг эрхлэх газрын дарга С.Бямбацогт болон “Эрдэнэс Монгол” ХХК-ийн удирдлагууд албаны бусад хүмүүс өнөөдөр наймдугаар сарын 21-ний өдөр “Дарханы төмөрлөгийн үйлдвэр” ХХК-д ажиллаж үйлдвэрийн үйл ажиллагаа, нөхцөл байдалтай танилцлаа.

    Төмөрлөгийн үйлдвэр энэ оны хагас жилийн байдлаар 18.3 мянган тонн ган бүтээгдэхүүн үйлдвэрлэсэн бол 1.815.7 мянган куб метр уулын цул олборлож гүйцэтгэлийн төлөвлөгөөгөө тус бүрд нь давуулан биелүүлжээ. Мөн 1.1 сая тонн төмрийн хүдрийн баяжмал экспортлон, 13.5 мянган тонн ган бүтээгдэхүүн борлуулж бүтээгдэхүүн борлуулалтын төлөвлөгөөгөө ч давуулан, 36.7 тэрбум төгрөгийн цэвэр ашигтай ажиллан, улс орон нутгийн төсөвт 51.7 тэрбум төгрөгийг төвлөрүүлж зорилтот түвшний голлох үзүүлэлтүүдийг бүрэн ханган ажиллажээ.

    Түүнчлэн ажилчдынхаа цалинг 2-3 удаа 50 хүртэлх хувиар нэмэгдүүлсэн гээд залуу даргатай шинэ удирдлагын багийн зөв менежментийн үр дүнд гарсан эерэг үзүүлэлтүүд их байгаа ч өнөөдөр үйлдвэрлэлийнхээ нийт хүчин чадлын ердөө 20 орчим хувийг ашиглаж байгаа нь гадагш урсах валютыг нэмэгдүүлж байна. Иймд өртөг зардлаа сайтар нягтлан бүрэн хүчин чадлаараа ажиллахад онцгой анхаарахыг Монгол Улсын сайд үүрэг болголоо. Хаягдал төмрийг анхин боловсруулж бүтээгдэхүүн үйлдвэрлэх үйл ажиллагаагаа нэмэгдүүлэх, үнэ хямд, чанар сайтай арматур үйлдвэрлэж дотоодын хэрэгцээг бүрэн хангах үндсэн зорилгоосоо хазайхгүй ажиллахыг мөн санууллаа.

    Монгол Улсын Засгийн газрын 14 мега төслийн нэг нь Гангийн цогцолбор юм. Тус төслийг бодит болгох ажлыг эрчимжүүлэх талаар өнөөдөр мөн ярилцаж Төмөрлөгийн үйлдвэрийг “Эрдэнэс Монгол” толгой компанитай бодлогоо нэгтгэн Гангийн үйлдвэрийг байгуулах олон улсын нээлттэй тендер зарлан стратегийн хөрөнгө оруулагч орж ирсний дараа байршлаа эцсийн байдлаар тодорхойлж дараа дараагийн асуудлуудыг ярилцан шийдвэрлэх, урьдчилсан ТЭЗҮ-ийг яаралтай боловсруулах зэрэг зарчмын шийдэл гаргалаа.

    Ган боловсруулах цогцолбор ашиглалтад орсноор жилд нэг саяас дээш тонн хэмжээний ган үйлдвэрлэж, дотоодынхоо гангийн хэрэгцээг бүрэн хангаж 1200 орчим шинэ ажлын байр бий болох тооцооллыг гаргаад байгаа юм. Өнөөдрийн уулзалтад Дархан-Уул аймгийн ИТХ-ын дарга А.Янжмаа, Засаг дарга Б.Азжаргал, ЗДТГ-ын дарга О.Хүрэлчулуун, ХОХБТХ-ийн дарга П.Батсүх нар мөн оролцсон юм. Аймгийн удирдлагуудын зүгээс орон нутагт Гангийн цогцолбор байгуулах газрын асуудлыг шийдвэрлэх бүрэн боломжтойг хэлээд Засгийн газрын бодлого шийдвэрийг дагаж ажиллахаа илэрхийллээ.