БНСУ-ын хамгийн том энтертайнментүүдийн нэг “SM”-ийн гаргасан хөвгүүдийн NCT хамтлагийн гишүүн асан Taeil хоёр найзтайгаа нийлж, согтууруулах ундаа хэрэглэсэн эмэгтэйг хүчирхийлсэн хэргээр шалгагдаж байна. Өнгөрсөн наймдугаар сарын сүүлчээр SM энтертайнмент Taeil-ийг "Бэлгийн хүчирхийллийн гэмт хэрэгт холбогдсон эрүүгийн хэрэгт сэжигтнээр татагдсан” хэмээгээд NCT хамтлагаас гаргаж байгаа талаар мэдэгдэл гаргасан. Түүнийг зургадугаар сараас хойш сэжигтнээр татаж, мөрдлөг хийж байсан талаараа БНСУ-ын цагдаагийн газраас мэдээлсэн. Түүний гэм буруутай нь тогтоогдвол багадаа долоон жил эсвэл насаараа ч шоронд хоригдож магадгүй юм.

Тэрбээр 1994 оны зургадугаар сарын 14-нд төрсөн. 2015 оны  аравдугаар сарын 13-нд S.M Rookies-ийн албан ёсны гишүүнээр танилцуулагдсан.  Taeil 2016 оны дөрөвдүгээр сард NCT хамтлагт дэбют хийж байсан юм. Тэрбээр 2023 онд мотоциклийн ослын улмаас хагалгаанд орсон бөгөөд хамтлагаасаа түр завсарлага авсан байх үеэрээ шөнийн цэнгээний газар орсон нь хүмүүсийн шүүмжлэл хүртээд байсан юм.

NCT хамтлагийн гишүүн Lucas олон эмэгтэйтэй зэрэг уулзах, найз охиноороо их хэмжээний зүйл авхуулсан зэрэг хэрэгт холбогдож байсан юм.