ОХУ-ын Ерөнхийлөгч Владимир Путин цөмийн бодлогын асуудлаар хийсэн Аюулгүй байдлын зөвлөлийн хуралдааны үеэр тус улсын цөмийн зэвсгийг хэрэглэх нөхцөлд хэд хэдэн өөрчлөлт, тодотгол оруулах санал гаргажээ. Тэрбээр "Цөмийн тогтоон барих чиглэлээр төрөөс баримтлах бодлогын үндэс" баримт бичгийн шинэчилсэн хувилбарт цөмийн зэвсэггүй аливаа улсын зүгээс цөмийн зэвсэг эзэмшдэг улс орны оролцоо, дэмжлэгтэйгээр ОХУ-ын эсрэг хийсэн түрэмгийллийг ОХУ руу хийсэн хамтын халдлага гэж үзэх санал гаргасан байна.

Түүнчлэн хэрэв дайсан ердийн зэвсэг хэрэглэн Орос, Беларусьт ноцтой аюул занал учруулж буй тохиолдолд Москва цөмийн зэвсгийг довтолгоонд ашиглах эрхийг өөртөө үлдээж байна гэж В.Путин нэмж хэлжээ. Энэ бүх асуудлыг Беларусийн Ерөнхийлөгч Александр Лукашенкотой зөвшилцсөн талаар онцолсон байна. Мөн цөмийн тогтоон барих бодлогыг баримталж буй улс орон, цэргийн эвслүүдийн ангиллыг өргөжүүлэх, мөн тогтоон барих арга хэмжээнүүдийг ашигладаг аюулуудын жагсаалтыг өргөжүүлэхийг санал болгожээ.

"Энэ зэвсэг асар хүчтэй гэдгийг бид маш сайн ухамсарладаг тул асуудалд маш хариуцлагатай хандаж, цөмийн зэвсэг, тэдгээрийн бүрэлдэхүүн хэсгүүдийг үл дэлгэрүүлэхийн тулд дэлхийн тогтвортой байдлын олон улсын эрх зүйн орчныг бэхжүүлэхийг үргэлж эрэлхийлсээр ирсэн" талаар Владимир Путин онцолсон байна.