“SpaceX” компани ойрын ирээдүйд Ангараг гараг​​ руу таван сансрын хөлөг хөөргөхөөр төлөвлөж байгаа талаар тус компанийг үүсгэн байгуулагч, гүйцэтгэх захирал Элон Маск албан ёсны “X” хаягаараа дамжуулан мэдэгджээ. Тухайлбал, Ангараг руу хөөргөх “Starship” хөлгийн талаар Элон Маск “Анхны жолоодлогот нислэгийн хугацаа нь эдгээр нислэгийн амжилтаас хамаарах бөгөөд амжилттай газардвал дөрвөн жилийн дараа жолоодлогот нислэг үйлдэх болно. Гэсэн хэдий ч саад бэрхшээл тулгарвал жолоодлогот нислэгийг дахин хоёр жилээр хойшлуулна" гэсэн байна.

Олон улсын шинжээч, судлаачид “SpaceX” компанийн хөлгөө хөөргөх товоо байнга өөрчилдөг гэж шүүмжилдэг. Харин Элон Маск “Starship” хөлгийг таван жилийн дотор Ангараг дээр газардуулж, сансрын нисгэгчдийг долоон жилийн дотор тус гараг дээр буулгана” хэмээн мэдэгдсэн байдаг.

Мөн энэ оны зургадугаар сард “Starship” хөлгийн дөрөв дэх туршилт амжилттай болж, Энэтхэгийн далайд зөөлөн газардсан юм. 2020-иод оны сүүлчээр Сар руу хүмүүс болон ачаа илгээх, улмаар Ангараг гараг руу нисэж чадах том, олон зориулалт бүхий шинэ үеийн сансрын хөлөг бүтээхийн тулд Элон Маск “Starship” хөлөгт ихээхэн найдлага тавьж байгаа юм.

Энэ оны эхээр НАСА “SpaceX”-ийн “Starship”-ийг ашиглан сүүлийн хагас зуун жилийн хугацаанд Саран дээр анх удаа сансрын нисгэгчдийг буулгах төлөвлөгөөгөө 2026 оны есдүгээр сар хүртэл хойшлуулсан юм. Өмнө нь энэ ажиллагааг 2025 оны сүүлчээр явуулахаар төлөвлөж байв.

Түүнчлэн зургадугаар сард Японы тэрбумтан Юсакү Маэзава “Starship” хөлгөөр Сар руу аялах төлөвлөгөөгөө сансрын хөлгийг хөөргөх хугацааг хойшлуулж, ойрын хугацаанд хөөргөх тодорхой хуваарь байхгүй учраас цуцалсан байдаг.